المقادير : 1/2 كيلو لحم مفروم (او حسب الرغبة )
2 بصلة متوسطة - بيضة - ملح - فلفل - بهار- حبهان (بودر) - ورق لوري - زنجبيل (بودر) - بردقوش - بقسماط .
للتغطية: بيضة مخفوقة عليها رشة ملح ورشة فلفل - بقسماط .
الطريقة : نفرم البصل ناعم جدا بالمبشرة أو الكبة ونحط البيضة والملح والفلفل والتوابل كلها والبقسماط ( البقسماط علشان اللحمة المفرومة تتماسك ومتكونش طرية لان البيضة بتخليها طرية ) ونقلبهم كويس جدا لحد اللحمة ما تبقي قوامها مناسب ، بعد كده نقسم اللحمة قطع متساوية وندورها ونبططها زي شكل الطعمية ( علي فكرة ممكن تتشكل حسب الرغبة بس الشكل ده بيخلي الكفتة احلي ) ، بعد كده نحط الكفتة في البيض وبعدين البقسماط وبعدين نقليها في الزيت لحد ما لونها يبقي جميل .
والهنا والشفا .
ملحوظة : ممكن بنفس تتبيلة الكفتة السابقة تتصبع وتتحط في صينية مدهونة سمن وتدخل الفرن ويتقطع عليها ترنشات بصل وتغطي بالفويل وتدخل الفرن بتبقي خطيرة .
الجمعة فبراير 03, 2012 3:22 pm